GODE FORMÅL

I fjor på denne tid strikka eg 2 lappeteppe til sjukehuset i Okhaldhunga i Nepal.  Sjukehuset ligg langt oppi fjella og vintrane er kalde.  Jorunn i Bergen samlar inn teppe og sender til Kristin og Erik Bøhler, som jobbar på sjukehuset.  Babyar som vert fødde på sjukehuset, får eit teppe med seg når dei reiser heim.  No har eg strikka ferdig eit teppe til og denne gongen har eg brukt opp Sisu restegarnet mitt.  Måtte supplere med nyinnkjøp av eit par nøster for å få nok.  Dette er ein vinn - vinn situasjon;  eg får brukt restegarnet mitt til noko fornuftig, og ein liten baby kan halda seg varm og god.  Rutene er strikka i rillestrikk og er ca 15x15 cm.  Utanpå teppet har eg hekla ein omgang med fastmasker og deretter ein liten pyntekant.
Har du lyst å lesa meir om dette prosjektet, kan du lese om det her.  Teppet mitt må no liggja på vent til hausten før eg kan senda det, for no skal Kristin og Erik pakke saman før sommaren og dei dreg ikkje attende før i slutten av august.

50-øringen er snart historie.  I forbindelse med dette har Kreftforeninga oppfordra til å samla inn 50-øringar og støtta det viktige arbeidet dei gjer.  Vi har hatt ein liten innsamlingsaksjon i heimen, og med stort bidrag frå yngstejenta sin sparekasse har vi funne fram 264 myntar som no er gjort klar og er på veg til banken i morgon.  Oppfordrar alle som les dette om å gå på innsamlingstokt i heimen -  kvar einaste 50-øring tel.

Påskehelg og småstrikk

Størstedelen av påskehelga vart tilbrakt på hytta.  Dei fleste dagar med strålande ver.  Litt for kaldt til å sitja lenge på terrassen og nyta den flotte utsikta me har.

Bak hytta vår er det lauvskog, og bjørkene har vakse seg kjempehøge.  Med fare for at dei kunne falle over både straumledningen og hytta, gjekk vi i gang med å fella 7 kjempehøge trær 15 meter høge.  Ein risikosport som fekk hjarta til å banka fortare enn normalt når mannen saga og eg og jentene skulle prøva å sikra trea ved å dra i tau som mannen hadde festa rundt trea - men det gjekk bra, trea fall der dei skulle.

Ein dag gjekk vi ein flott tur opp på Tysnessåta, 752 m.o.h.  Ei fantastisk utsikt over store delar av Sunnhordland!

Litt strikking vart det også innimellom.  Ein kjøkkenklut strikka i bilen og 2 par sokkar strikka av restegarn i Opal.  Eine paret hadde eg akkurat nok garn til, det andre paret er restar frå 2 ulike nøster.
Sokkane er strikka på p 2,5 og eg la opp 60 masker.  Kjøkkenkluten er strikka i Tuva garn - 60 m og p 4.

Har også fått ferdig pynten på eit smykkesjal.  Her har eg lagt opp 3 m og auka 2 m kvar 2. pinne til 15 m.  Så strikka eg ca 1,5 meter og felte av til eg hadde 3 m att.  Pynten er laga av ei tova ullkule, ei svart trekule og ein "sølvring".

Mobilvottar

I natt har vi stilt klokka mot sommaren og i går hadde vi ein fantastisk vårdag her i Nordhordland, så eg får skunda meg å leggja ut bilete av mobilvottane eg har strikka blant anna av restar etter selbuvottane eg har strikka i vinter.  Eg strikka ein mobilvott til meg sjølv tidlegare, og synes den har vore veldig grei å bruke utanpå mobilen når eg har gått tur i regn og kulde.  Får håpe vi ikkje treng å bruke desse så mykje før til hausten att!  Fine å ha til smågåver.  Mønsteret har eg funne hjå Steinkjerringa

SELBUVOTTAR IGJEN

Har strikka eit nytt par dame selbuvottar.  Vottane er strikka i Falk på p nr 3.  Kunne med fordel ha strikka dei på p 2,5 då dei vart litt lange til mi hand - stor damestr.  Mønsteret er ei gratisoppskrift som finst her.

SELBUVOTTAR

Då er eg ferdig med eit nytt vottepar, denne gong i herrestorleik.  Mønsteret er frå heftet Votteboken til Thuvestua og vottane er strikka i Heilo på p 2,5.

Sjøulk

På strikkesida på FB såg eg nokon som hadde laga denne vinflaskeskjularen - Sjøulken.  Syntes den var kjempefin, og tinga straks ein materialpakke hjå Den blå tråd på Sortland i Vesterålen.  Pakken kom eit par dagar etter og det tok meg ikkje lang tid å få denne ferdig.  Sjøulken er strikka i Lettlopi garn på pinne 5,5.  Deretter tova i maskin på 40 grader.  Synes kanskje den vart litt for hårete, så neste gong (for eg skal heilt sikkert strikka fleire) trur eg at eg vil prøva eit anna garn.  Fiskegarnet er hekla av englemasker i Viking Sportsragg på heklekrok nr 4.  Sjøulken passar ikkje i mitt hus, synes eg, men eg har ein plan for kven som skal få den i gåve.

Gryteklutar med båtmotiv

For nokre år sidan kjøpte eg ein liten materialpakke til desse gryteklutane då eg var på hytta vår.  Eg begynte nok å strikka på dei straks, men tenkte eg kunne ha dette arbeidet liggjande på hytta til ein annan gong.  Strikkearbeidet vart lagt i ei korg med lokk, og der vart det gløymt lenge.  Gryteklutane er strikka på liten rundpinne og deretter har eg hekla ein pyntekant rundt.  Gryteklutane vart ei lita gåve og befinn seg no ombord i ein flott seglbåt.

Selbuvottar

Har strikka eit par dame selbuvottar frå eit hefte "Vottenboken" frå Thuve-Stuva.  Mønsteret heiter Finnmark og er strikka i Heilo garn på pinne nr 2,5.  Trur eg skal ha desse sjølv, dei gamle selbuvottane mine har sett sine beste dagar.  Det var kjekt å strikka selbuvottar, så eg har alt nesten strikka ferdig eit par herrevottar også frå same heftet.

Vinvesker

Har endeleg fått pynt på desse vinveskene.  Eg kjem gjerne til å vera på jakt etter andre knappar eller perler og byta ut knappane på nokre av vinveskene.  Får surfa litt på nettet og sjå kva eg finn.  Vinveskene er strikka i Mor Aase ullgarn og tova etterpå.  Mønsteret har eg funne her.
 

Tine Solheim flettejakke

Mønsteret til denne jakken stod i eit julenummer av Familien for eit par år sidan.  Hadde garnet liggjande ei god stund før eg begynte å strikka på jakken.  Eg fekk for lite garn til kragen og kjøpte inn eit garn til.  Også det var for lite, og endå eit nøste måtte til.  Fekk sjølvsagt ikkje same partinr så lenge etter førsteinnkjøpet, men heldigvis kan ein ikkje sjå dette.  Veit ikkje kor mykje eg kjem til å bruka denne jakken, vart eigentleg ganske stor og litt tung.  Må iallefall sjå om eg kan få tak i eit raudt strikkbelte som eg kan bruka til.  Jakken er strikka i Alfa frå Sandnesgarn på pinne nr 10.  Ein strørrelse på mønsteret; str 38-42, og eg burde nok ha strikka med mindre størrelse på pinnane.

Raggsokkar

Eg har hatt liggjande ein del raggsokkegarn frå Hifa, og no har eg fått brukt opp alt grått.  Har strikka 4 par sokkar i ca str 43.  Har lagt opp 56 m og brukt p nr 3.

Pulsvarmarar

For nokre år sidan hadde eg 2 angorakaninar og no har eg strikka 2 sett kvite pulsvarmarar av litt av garnet.  Begge para har forsvunne ut av huset som gåver.  Garn frå angorakanin isolerer ti gongar meir enn vanleg saueull vert det sagt.  Det tredje paret har eg strikka i BabySilk alpakkagarn frå Du store Alpakka.  Nydeleg garn det også.  Mønsteret har eg funne i Norsk Ukeblad på nettet via ein link dei hadde lagt ut der   pga feil i det utgjevne bladet.  Angoragarnet eg har brukt her er maskinspunne, synes det eigna seg best til desse pulsvarmarane for å få mønsteret best mogeleg fram, i høve til det handspunne garn mitt som eg eigentleg likar best.  Alt til sitt bruk.

Mobilvott

I Steinkjerringa sin blogg har eg sett mønsteret på denne flotte mobilvotten med Selbumønster.  Eg har hatt denne i tankane heilt sidan eg kjøpte meg ny mobil i sommar og no har eg kosa meg med å strikka meg ein.
No skal ikkje mobilen min frysa!  Skjønt frysa; her like nord for Bergen har det regna, - og regna, - og regna i eit minst eit halvt år!  Men så får eg heller seia det slik at eg ikkje skal få regndråpar i mobilen min då iallefall.

Kjøkkenklutar

Kjøkkenklutar er eit greit arbeid å ty til.  Eg rekk for eksempel å strikka ein klut som passasjer i bil på veg til eller frå hytta.  I løpet av hausten har eg strikka ferdig 7 kjøkkenklutar.  Nokre av dei har eg gjeve vekk som ei  lita oppmerksomheit både til jul og ved andre høve, gjerne saman med ein oppvaskkost.    Ungdomane i huset har fått klutar med seg til leiligheita i Bergen og som mange andre synes dei desse heimestrikka kjøkkenklutane er dei beste!  Då er det ekstra kjekt både å strikka og gje dei vekk. Mine klutar vert for det meste strikka i Tuva, og dei held seg utruleg godt ved vask også på høg temperatur.  Legg opp
60 m, strikkar 1 omg rett, neste omg 1 r 1 vr og gjentek desse omgongane til eg har brukt opp nøstet.

Flaskenissar

Desse flaskenissane har stått ferdige ei stund, men har mangla auge.  Etter litt leiting viste det seg at eg hadde akkurat passeleg store auger i huset, og då gjenstod det berre å få sett dei på.  Nissane er strikka i Fritidsgarn og deretter har dei fått eit par omgangar i vaskemaskina for toving.  Oppskrifta finst i fleire ulike strikkehefter.  Min størrelse passar til store brusflasker og kan også brukast til vinflasker, men då er dei litt i største laget.  Julerødvinen på biletet var ei gåve til jul, og innhaldet er forlengst vekke.  Nydeleg god vin!

Julekrybbe del 2

I romjula har eg fått gjort ferdig andre del av julekrybba av fellesprosjektet på Hobbyboden.  To gjetarar og 2 sauer har vorte ferdigmontert.  No manglar eg dei 3 vise menn og engel, men det får verta eit prosjekt for 2012.

"Papirengler"

Tidlegare i haust gjorde eg ferdig dette veggopphenget med "papirenglar".  Effektane på englekjolane har eg fått fram ved å laga krympestoff, ein teknikk eg aldri hadde vore borti før.  Storleiken på opphenget er ca 45x65 cm og heng i stova mi no i jula.  Fargane passar godt inn i hjå meg, og eg synes det er mykje finare der det heng på veggen min enn det eg har klart å få fram på biletet.  Mønsteret er AnnAKa sitt frå 2009.

Julekrybbe del 1

Har endeleg fått gjort ferdig del 1 av julekrybbeprosjektet som pågår på Hobbyboden.  Josef, Maria og Jesusbarnet er på plass.  Del 2 består av gjetarar og sauer og tilslutt kjem dei 3 vise menn.  Nesten ferdig med dei 2 gjetarane også, men må venta på mønster på sauene.  Strikkar av restegarn i Sisu på p 2,5.

"Julegaver"

Utruleg kor fort tida går. Kjempelenge sidan eg har blogga! Det betyr ikkje at eg har lagt på latsida denne hausten. Tvertimot har eg fått gjort ferdig (nesten) alle ufo-ane mine + litt til.

Sidan det nærmar seg jul, passar det å leggja ut dei julerelaterte produkta mine framover. I dag er det AnnAKa sine "Julegaver" som vert blogga. Som vanleg har eg handapplikert figurane; kosar meg med slikt arbeid.

På bærtur

Denne løparen har eg hatt liggjande ferdig ei stund. Også dette mønsteret er AnnAKa sitt og ho har kalla det "På bærtur". Høver godt å ta denne blåbærduken i bruk no på seinsommaren med hausten like rundt hjørnet. No ventar eg spent på å få Eventyrteppet og Roseteppet i retur frå

Meretes quiltestue.

Rose

22. juli var vi i Spania på ferie. 2 kanalar på TV og ingen internett. Den eine TV kanalen var Eurosport så vi fekk iallefall sett Tour de France og den flotte norske innsatsen av nordmennene!

Då vi kom heim att, var beda overgrodde med ugras, og blomar var avblomstra. I fjor flytta eg nokre rosetre som var heller skrøpeleg til eit av beda mine for å sjå om dei ville ta seg opp att denne sommaren. Det gjorde dei ikkje. Eg ser ut i eit av beda mine og kva ser eg oppi alt ugraset; ei einsleg, stor og nydeleg rose! Nesten symbolsk etter hendingane 22. juli. Av og til er eg og andre familiemedlemer så heldige at vi får ei rose i ei eller annan samanheng. Eg har i mange, mange år vore på jakt etter ein blomstervase til å ha desse i. I helga skal vi i bryllaup, og då eg var inne i ein TILBORDS butikk for å finna ei gåve til brudeparte, finn eg vasen eg har leita etter. Nederst er vasen forma som eit hjarte. Nesten symbolsk det også i desse dagar. Den einslege rosa vart sett i den nye vasen - og for ei lukt. Trur ikkje eg har kjent maken til god lukt på ei rose. Iallefall ikkje frå min hage.

Margerittar

Har begynt å få ferdig ein del av UFO-ane mine. Her er den første UFOen eg gjorde ferdig; Margerittløparen med AnnAKa sitt mønster. Kjøpte materialpakke hjå Lappedilla for 2 år sidan då eg var på ferie nordover. Vart veldig fornøgd med denne; både mønster og fargesamansetjinga.
Har også gjort ferdig Eventyrteppet og Roseteppet (desse er også AnnAKa mønster), og har gjort avtale med Merete som skal quilta begge teppa for meg. Må prøva å få sendt dei avgarde i morgon.