Inger sin hobbykrok

Tine Solheim flettejakke

2012-02-12T11:31:00.000+01:00

Mønsteret til denne jakken stod i eit julenummer av Familien for eit par år sidan. Hadde garnet liggjande ei god stund før eg begynte å strikka på jakken. Eg fekk for lite garn til kragen og kjøpte inn eit garn til. Også det var for lite, og endå eit nøste måtte til. Fekk sjølvsagt ikkje same partinr så lenge etter førsteinnkjøpet, men heldigvis kan ein ikkje sjå dette. Veit ikkje kor mykje eg kjem til å bruka denne jakken, vart eigentleg ganske stor og litt tung. Må iallefall sjå om eg kan få tak i eit raudt strikkbelte som eg kan bruka til. Jakken er strikka i Alfa frå Sandnesgarn på pinne nr 10. Ein strørrelse på mønsteret; str 38-42, og eg burde nok ha strikka med mindre størrelse på pinnane.

Raggsokkar

2012-01-14T15:32:00.000+01:00

Eg har hatt liggjande ein del raggsokkegarn frå Hifa, og no har eg fått brukt opp alt grått. Har strikka 4 par sokkar i ca str 43. Har lagt opp 56 m og brukt p nr 3.

Pulsvarmarar

2012-01-08T10:09:00.000+01:00

For nokre år sidan hadde eg 2 angorakaninar og no har eg strikka 2 sett kvite pulsvarmarar av litt av garnet. Begge para har forsvunne ut av huset som gåver. Garn frå angorakanin isolerer ti gongar meir enn vanleg saueull vert det sagt. Det tredje paret har eg strikka i BabySilk alpakkagarn frå Du store Alpakka. Nydeleg garn det også. Mønsteret har eg funne i Norsk Ukeblad på nettet via ein link dei hadde lagt ut der pga feil i det utgjevne bladet. Angoragarnet eg har brukt her er maskinspunne, synes det eigna seg best til desse pulsvarmarane for å få mønsteret best mogeleg fram, i høve til det handspunne garn mitt som eg eigentleg likar best. Alt til sitt bruk.

Mobilvott

2012-01-07T10:04:00.000+01:00

I Steinkjerringa sin blogg har eg sett mønsteret på denne flotte mobilvotten med Selbumønster. Eg har hatt denne i tankane heilt sidan eg kjøpte meg ny mobil i sommar og no har eg kosa meg med å strikka meg ein.
No skal ikkje mobilen min frysa! Skjønt frysa; her like nord for Bergen har det regna, - og regna, - og regna i eit minst eit halvt år! Men så får eg heller seia det slik at eg ikkje skal få regndråpar i mobilen min då iallefall.

Kjøkkenklutar

2012-01-07T09:48:00.000+01:00

Kjøkkenklutar er eit greit arbeid å ty til. Eg rekk for eksempel å strikka ein klut som passasjer i bil på veg til eller frå hytta. I løpet av hausten har eg strikka ferdig 7 kjøkkenklutar. Nokre av dei har eg gjeve vekk som ei lita oppmerksomheit både til jul og ved andre høve, gjerne saman med ein oppvaskkost. Ungdomane i huset har fått klutar med seg til leiligheita i Bergen og som mange andre synes dei desse heimestrikka kjøkkenklutane er dei beste! Då er det ekstra kjekt både å strikka og gje dei vekk. Mine klutar vert for det meste strikka i Tuva, og dei held seg utruleg godt ved vask også på høg temperatur. Legg opp
60 m, strikkar 1 omg rett, neste omg 1 r 1 vr og gjentek desse omgongane til eg har brukt opp nøstet.

Flaskenissar

2011-12-31T15:16:00.000+01:00

Desse flaskenissane har stått ferdige ei stund, men har mangla auge. Etter litt leiting viste det seg at eg hadde akkurat passeleg store auger i huset, og då gjenstod det berre å få sett dei på. Nissane er strikka i Fritidsgarn og deretter har dei fått eit par omgangar i vaskemaskina for toving. Oppskrifta finst i fleire ulike strikkehefter. Min størrelse passar til store brusflasker og kan også brukast til vinflasker, men då er dei litt i største laget. Julerødvinen på biletet var ei gåve til jul, og innhaldet er forlengst vekke. Nydeleg god vin!

Julekrybbe del 2

2011-12-31T14:55:00.001+01:00

I romjula har eg fått gjort ferdig andre del av julekrybba av fellesprosjektet på Hobbyboden. To gjetarar og 2 sauer har vorte ferdigmontert. No manglar eg dei 3 vise menn og engel, men det får verta eit prosjekt for 2012.

"Papirengler"

2011-12-30T17:30:00.001+01:00

Tidlegare i haust gjorde eg ferdig dette veggopphenget med "papirenglar". Effektane på englekjolane har eg fått fram ved å laga krympestoff, ein teknikk eg aldri hadde vore borti før. Storleiken på opphenget er ca 45x65 cm og heng i stova mi no i jula. Fargane passar godt inn i hjå meg, og eg synes det er mykje finare der det heng på veggen min enn det eg har klart å få fram på biletet. Mønsteret er AnnAKa sitt frå 2009.

Julekrybbe del 1

2011-12-06T22:16:00.000+01:00

Har endeleg fått gjort ferdig del 1 av julekrybbeprosjektet som pågår på Hobbyboden. Josef, Maria og Jesusbarnet er på plass. Del 2 består av gjetarar og sauer og tilslutt kjem dei 3 vise menn. Nesten ferdig med dei 2 gjetarane også, men må venta på mønster på sauene. Strikkar av restegarn i Sisu på p 2,5.

"Julegaver"

2011-12-04T18:40:00.004+01:00

Utruleg kor fort tida går. Kjempelenge sidan eg har blogga! Det betyr ikkje at eg har lagt på latsida denne hausten. Tvertimot har eg fått gjort ferdig (nesten) alle ufo-ane mine + litt til.

Sidan det nærmar seg jul, passar det å leggja ut dei julerelaterte produkta mine framover. I dag er det AnnAKa sine "Julegaver" som vert blogga. Som vanleg har eg handapplikert figurane; kosar meg med slikt arbeid.

På bærtur

2011-08-29T21:41:00.002+02:00

Denne løparen har eg hatt liggjande ferdig ei stund. Også dette mønsteret er AnnAKa sitt og ho har kalla det "På bærtur". Høver godt å ta denne blåbærduken i bruk no på seinsommaren med hausten like rundt hjørnet. No ventar eg spent på å få Eventyrteppet og Roseteppet i retur frå

Meretes quiltestue.

Rose

2011-08-05T09:09:00.004+02:00

22. juli var vi i Spania på ferie. 2 kanalar på TV og ingen internett. Den eine TV kanalen var Eurosport så vi fekk iallefall sett Tour de France og den flotte norske innsatsen av nordmennene!

Då vi kom heim att, var beda overgrodde med ugras, og blomar var avblomstra. I fjor flytta eg nokre rosetre som var heller skrøpeleg til eit av beda mine for å sjå om dei ville ta seg opp att denne sommaren. Det gjorde dei ikkje. Eg ser ut i eit av beda mine og kva ser eg oppi alt ugraset; ei einsleg, stor og nydeleg rose! Nesten symbolsk etter hendingane 22. juli. Av og til er eg og andre familiemedlemer så heldige at vi får ei rose i ei eller annan samanheng. Eg har i mange, mange år vore på jakt etter ein blomstervase til å ha desse i. I helga skal vi i bryllaup, og då eg var inne i ein TILBORDS butikk for å finna ei gåve til brudeparte, finn eg vasen eg har leita etter. Nederst er vasen forma som eit hjarte. Nesten symbolsk det også i desse dagar. Den einslege rosa vart sett i den nye vasen - og for ei lukt. Trur ikkje eg har kjent maken til god lukt på ei rose. Iallefall ikkje frå min hage.

Margerittar

2011-08-04T19:57:00.004+02:00

Har begynt å få ferdig ein del av UFO-ane mine. Her er den første UFOen eg gjorde ferdig; Margerittløparen med AnnAKa sitt mønster. Kjøpte materialpakke hjå Lappedilla for 2 år sidan då eg var på ferie nordover. Vart veldig fornøgd med denne; både mønster og fargesamansetjinga.
Har også gjort ferdig Eventyrteppet og Roseteppet (desse er også AnnAKa mønster), og har gjort avtale med Merete som skal quilta begge teppa for meg. Må prøva å få sendt dei avgarde i morgon.

Vinposar

2011-05-28T19:18:00.003+02:00

Endeleg har eg fått gjort ferdig pynten på desse to vinposane. Leita ei stund etter passande perler som eg kunne bruka til pynt, og tilslutt fann eg dei hjå Panduro. Vinposane er strikka i fritidsgarn på pinne 5 1/2 og tova i vaskemaskin etterpå. Oppskrifta har eg funne i eit hefte frå Sandnes - Tema 16 toving.

Dei neste innlegga mine vil handla om lappeteknikk, no legg eg nemleg strikkepinnane vekk for ei stund for å gjera ferdig Ufo-ane mine som eg skreiv om i eit tidlegare innlegg. Eg er allereie godt i gong og dei ferdige resultata kjem litt etter litt her i bloggen min.

Dress til Babyborn

2011-04-25T11:16:00.004+02:00

Denne heile dressen med lue og strømpar til Babyborn har eigentleg vore ferdig ei stund, men har mangla knappar. No er knappane kjøpt inn og sydd på. Dressen er strikka i Sisu på p 2 1/2 og 3, og mønsteret har eg funne i eit hefte frå Sandnesgarn 0702 dukke.

Kjøkkenklutar

2011-04-25T11:08:00.002+02:00

Har strikka 5 nye kjøkkenklutar innimellom andre gjeremål i påskehelga. Godt å ha eit lite lager å ta av når ulike anledningar byr seg til å gje ei lita gåve til ein eller annan anledning. Klutane er strikka i Tuva garn på p nr 4.

Gamle hus

2011-04-21T16:06:00.003+02:00

På nabogarden på hytta står det nokre gamle hus til nedfalls, hus prega av tidas tann. Slik har dei stått så lenge eg kan minnast, heilt frå min eigen barndom og lenge før det. Dei som ein gong har budd her, bygde seg nytt hus like ved desse gamle bygningane, men dei gamle husa vart aldri rivne.

Påske på hytta

2011-04-21T15:49:00.006+02:00

Mesteparten av påskeferien i år er lagt til hytta. Vi har hatt nydeleg påskever sidan vi kom hit ned palmelaurdag. Dagane har stort sett gått med til vedarbeid etter at vinteren og snøen har herja i skogen bak hytta vår. Litt handarbeid har det også vorte tid til saman med krim i form av lydbøker. Utanfor hytta har våren kome for fullt. Kvitveis og kusymre blomstrar i bakkane. Påskeliljene står i full blomst og på trea er det like før knoppane spring ut.

Sokkar og tøflar

2011-04-21T15:39:00.003+02:00

Har brukt litt meir garn frå restegarnlageret mitt. Har strikka eit par stripete sokkar i str 38 av diverse restegarn og eit par tøflar i Trollgarn frå Hifa. Oppskrifta til tøflane finst som gratisoppskrift på heimesida deira. Tøflane tova eg 2 gongar på 40 grader i vaskemaskina før eg fekk dei i den størrelsen eg ville ha dei. Dei grå sokkane er strikka i str 43 i Hifa raggsokkgarn.

Nepaltepper

2011-03-20T11:54:00.005+01:00

På Okhaldunga sjukehus i Nepal arbeider Kristin og Erik Bøhler. Sjukehuset ligg langt oppi fjella og vintrane er kalde. I Bergen bur ei dame; Jorunn, som samlar inn ferdige ulltepper eller lappar som vert sydd saman til teppe. Ho sender desse teppa til Nepal. "Teppa vert brukte til pasientar som treng varme eller har vanskar med å få på seg klede pga skadar, og når babyar vert fødd på sjukehuset og mødrene ikkje har klær til å ha på barnet sitt så får dei eit lappeteppe som er strikka i Noreg". Synes dette er eit fantastisk flott tiltak, og såg at eg her kunne få brukt opp mykje av restegarnet mitt. I vinterferien strikka eg ferdig alle lappane og fekk montert 2 teppe. No har eg hekla ein pyntekant rundt det eine teppet, og er klar til å senda teppa. Det eine teppet har eg strikka i babyull og det andre i tjukkare ullgarn. Nokre av restane i babyullgarnet er ganske gamle, men no kom dei til nytte. Kjøpte inn 4 nøster Trysil ullgarn for å få litt friskare fargar i det eine teppet, ellers er alt restegarn. Har strikka 49 lappar á 15x15 cm til begge teppa, då vert teppa vel 1x1 m store. Teppet i babyullgarn veg 630 gram og det andre veg 762 gram. Det er ikkje brukt kvitt garn i teppa då kvit er dødens og sorgens farge i Nepal og derfor ikkje så aktuell farge å strikka med.

Det er mange rundt omkring i landet som strikkar eller heklar lappeteppe til Nepal, og dette kan lesast meir om i denne bloggen.

Kjørepose til BabyBorn

2011-03-07T16:43:00.006+01:00

Kjøreposen til Babyborn er strikka i Viking Balder på tjukke pinnar. Det gjekk veldig raskt å strikka opp dei 200 gr eg hadde kjøpt på ein garnbutikk i Bergen. Så sa det stopp. Eg mangla garn og ved neste bybesøk gjekk eg med raske steg til garnbutikken og skulle ha ei hespe til.

Men nei; dei solgte ikkje lenger dette garnet. Var det andre butikkar i sentrum som kunne ha dette? Ja, kanskje ein butikk i Strandgata som var i ferd med å avvikla. Heller ikkje her hadde

dei meir av det eg skulle ha. Arbeidet vart liggjande; skulle eg rekkje alt opp att og bruke

garnet til noko anna. Ein dag køyrde eg 15 min til Austrheim der dei har ein flott garnbutikk. Er der sjeldan då eg til vanleg ikkje har ærend den vegen. Og kva fann eg; lilla Viking Balder! Så kvifor gå over bekken etter vatn! Kjøreposen vart ferdig i ein fei og ei lita lue hadde eg også nok til!

Regnbuesokkar

2011-03-02T19:41:00.004+01:00

Desse sokkane har eg strikka mange av for nokre år attende. No har eg kjøpt inn garn på nytt og har tenkt å strikka opp ein del par til. Sokkane er populære gåver, fargerike som dei er.

Mønsteret er frå Hifa og sokkane er strikka i Hifa ullgarn med raggsokkgarn i hælen for å forsterka denne. Eg har brukt pinnar nr 3,5.

Dovrevotten

2011-03-01T13:07:00.004+01:00

Høyrde desse vottane omtala inne på Hobbyboden, og med mi interesse for historie, fekk eg lyst å strikka desse vottane. Oppskrifta fann eg i Norsk Husflid nr 7 - 2007. Dovre Husflidlag hadde ein konkurranse om ein Dovrevott i 2000, og då vann denne votten med Pilgrimsmerket. Bruken av merket måtte godkjennast av Riksantikvaren, og med godkjenninga fulgte ein klausul som sa at Pilgrimsmerket ikkje måtte brukast på andre tekstilar.

Eg har strikka vottane i originalgarnet Rauma 3-tråds strikkegarn på p 3 og brukt originalfargane

kvit, brun og raud.

Vinterferie og UFOar

2011-02-28T08:19:00.016+01:00

Her i vest har vinterferien starta denne veka. Eg har nytta helga til å dykka ned i UFOane mine og jammen hadde eg ein del av dei ja. Har kalla alt Ufoar eg, sjølv om nokre av dei er kit som ikkje er påbegynte eingong. I håp om at eg skal få dei ferdige før sommarferien, legg eg dei ut i bloggen min no. For nokre år sidan melde eg meg på eit AnnAKa abbonement hjå Lappedilla i Bodø, og fekk tilsendt materialpakkar til dei fleste nye mønster AnnAKa kom ut med. Og pakkane kom jamnt og trutt, men framdrifta gjekk ikkje i same tempo hjå meg! No er det strålande ver ute, så det spørs om eg heller må koma meg ut og nyta veret enn å sitja inn med handarbeida mine.

Ufo 1 "Eventyrteppet"

All stitchery og applikasjon er ferdig (alt handsydd). Gjenstår å "ramma" inn stitcherya og sy saman blokkene. Har gjort avtale med ei som skal quilte teppet for meg. Målet er å gjera ferdig til sending i løpet av morgondagen.

Ufo 2 "Julegåver"

Gjenstår å sy rundt applikasjonane.

Ufo 3 "Margeritter"

På denne løparen gjenstår quilting og lukkekant.

Ufo 4 "Papirengler"

Denne kit'en har eg ikkje starta på endå, men har kjøpt inn litt ekstra matr eg hadde trong for.

Ufo 5 "Kjøkkensett" med julemotiv

Dette er heller ikkje starta på. Har vaska alle stoffa.

Ufo 6 "Til Makeup".

Kit som ikkje er påbegynt.

Ufo 7 "Olivers høst"

Denne var eg godt i gong med, men då eg hadde quilta tversgåande saumar oppdaga eg at desse vart skeivare og skeivare. Har spretta oppatt alle og må sy dei på ein annan måte. Alle applikasjonane er ferdige til å setjast på.

Ufo 8 "Et roseteppe"

Dette er også ein kit som ikkje er påbegynt. Er nok ein del arbeid på denne, ja.

Ufo 9 "Brystduk og belte til Nordhordlandsbunad"

Brystduken manglar sting med mørkgrøn, beltet skal ha perler i dei kvite partia.

Ufo 10 Isoldenissar x 3

Har laga alle klær til 3 store Isoldenissar; strikka trøyer, sokkar og luer, sydd bukser, vestar og skjorter. Kroppane er kun oppteikna på stoff. Desse skal eg selja når så langt kjem.

Tine Solheim lue og vottar

2011-02-27T14:01:00.002+01:00

Er veldig glad i Tine Solheim sine kreasjonar og har no strikka Sonja lua og vottar. Mønsteret er med perler, men eg synes nesten det vart for "fint" til mitt daglege bruk. Dessutan vil eg tru at eg sparte meg for ein del arbeid også, utan at det var hovudgrunnen til at eg kutta dei ut. Synes eigentleg det er veldig fint med perler i dette mønsteret. Var innom ein bokhandel i går og såg i den nye boka til Tine Solheim, og der såg eg mønsteret var kome med. Kjøpte mønster hjå Husfliden i Bergen for ei tid sidan. Boka er sett på ynskjeliste.

Det gjekk raskt å strikka dette settet. Lua vart litt vid nede men no har eg kjøpt eit strikk til å ha inni. Om dette ikkje fungerer, får eg sy kanten litt strammare.

Sokkar

2011-02-13T13:23:00.006+01:00

Dei grøne sokkane er strikka i str 38 i Ida sokkegarn og dei grå sokkane er strikka i Hifa raggsokkgarn i str 38 på p 3.

Isskrapevott

2011-02-13T13:14:00.003+01:00

Denne isskrapevotten laga eg i jula, men den kom i bilen før eg fekk blogga den og har vore i bruk sidan. No har eg omsider fått tatt bilete. Har strikka i Fritidsgarn og litt effektgarn som eg ikkje hugsar kva heiter - kanskje det var Chili? Har tova tilslutt. Dette er den første isskrapevotten eg har laga, men det vert sikkert ikkje den siste.

Selbuvottar

2011-02-06T13:42:00.004+01:00

Mange år sidan sist eg strikka selbuvottar, men kjekt er det. Dei forrige selbuvottane mine var utslitne og det var på tida å få seg eit nytt par. Desse vottane er strikka i Rauma 2-tråds Gammelserie på p 2,5. Mønster er frå heftet Selbustrikk - votter, vanter, sokker .... LVS 5.

Gryteklutar

2011-02-06T13:37:00.003+01:00

Har hekla eit par gryteklutar i Mandarin Classic med heklenål nr 3. Det gjekk med akkurat 1 nøste til kvar gryteklut. Har hekla desse tidlegare også, dei er tjukke og gode i bruk. Mønsteret har eg funne i Sandnes sitt julehefte nr 0214.

Hjertekjole

2011-01-23T17:32:00.004+01:00

Tidleg i haust starta eg på "hjertekjolen" frå Drops. Skjørtet på kjolen gjekk raskt å strikka, men då eg kom til beltet, stoppa det opp. Begynte på armane, men å strikka nesten heile armane i 2 r 2 vr gjorde at arbeidet vart lagt til sides. Etter nyttår kom arbeidet fram att, og strikkinga gjekk som ein draum. Tok eigentleg ikkje lange tida før kjolen var ferdig. Var spent på størrelsen, men den vart heilt perfekt. Strikka nokre cm kortare på skjørtet, men kunne nok tenkt meg endå nokre cm kortare. Har strikka på p 3, 4 og 4,5 i originalfargane i oppskrifta - Drops Delight, Drops Kid Silk og Drops Cotton Viscose.

Snønissefamilie

2010-12-26T18:30:00.003+01:00

I romjula i fjor strikka eg klærne til desse snønissane frå Fagstrikk. Dei er strikka i Pt2 og bukser, skjørt, luer og sokkar er tova i vaskemaskina etterpå. Før jul fekk eg montert dei

ferdige og no sit dei fint på eit lite geitekjeskinn oppå ein stol i gangen min.

Løper på en kveld

2010-11-21T18:30:00.004+01:00

Advent nærmar seg med raske steg, og eg har akkurat fått gjort ferdig "Løper på en kveld".

Enkel å sy og resultatet vart eg godt fornøgd med. Løparen er pynta med flotte band.

Mønsteret til denne løparen designa av AnnAKa, fann eg i Quiltemagasinet nr 9/2009.

Prematurstrikk

2010-11-07T18:34:00.003+01:00

Då er 3 tepper og 4 prematurluer klare til å sendast til Vibbedille. Ho har denne hausten sett i gong innsamling av luer, sokkar og tepper til Stavanger universitetssjukehus. Luene er bittesmå, måler kun 8x10 cm, men siden dei er strikka i ribbestrikk, er dei elastiske og kan utvidast i forhold til storleiken på dei vesle hovuda. Det er lagt opp 72 masker til desse luene.

Teppa er strikka på skrå i rillestrikk etter eit mønster i Nøstebarnboka. Starta med 3 m i eit hjørne og auka ut 1 m på kvar pinne. Har strikka holrad som pynt på kantane.

Både luer og tepper er strikka i babyull. Greie arbeid å ha i bilen eller til TV-sjåing.

Pute med stitchery

2010-11-06T15:30:00.004+01:00

Hadde sydd eit stitchery som eg ikkje visste heilt kva eg skulle bruka til. Hadde ikkje lyst å laga eit bilete av det, slik det var gjort på mønsteret. Tilslutt vart det til ei pute, og eg vart veldig godt fornøgd med resultatet. Dette får bli mi personlege pute, trur eg.

Pjona vottar

2010-10-30T19:00:00.003+02:00

Sommaren 2009 var eg på ferie i Lofoten. Der var eg innom ein liten butikk som selde nydelege pjona barnevottar og barnesokkar. På heimvegen var eg innom Husfliden i Bodø, og der fann eg mønster på pjona vottar til vaksne. Eg kjøpte med meg mønster og garn, og har no pjona vottar som eg skal ha sjølv. Har brukt Rauma vamsegarn og heklenål nr 4 og 7. Vottane har perfekt passform til hendene mine og er utruleg mjuke og lodne inni. Dette kjem seg av at eg fukta vottane godt, smurde dei inn med såpe og børsta dei på vranga med ein stålbørste. Har aldri pjona før, men det var kjempelett og gjekk raskt å laga dei.

"Ei vårleg hjertehøne"

2010-04-24T17:50:00.002+02:00

I Quiltemagasinet 1/2010 fann eg mønsteret på denne løparen "Ei vårleg hjertehøne" av Ann A. Kanstad Johnsen. Løparen vart akkurat ferdig i tide til å ta med på hytta til påske.

Spiralsokkar

2010-04-24T17:38:00.002+02:00

Etter ei lang bloggtørke er eg no i gong med blogging igjen. At eg ikkje har blogga, betyr ikkje at eg ikkje har produsert noko, har halda på eit eller anna større eller mindre prosjekt heile tida.
Bilete av spiralsokkane er eit bevis på det, no er det heldigvis vår og snøen er vekke, men bileta er tekne tidlegare i år med snø som underlag. Har strikka sokkane i Robust på p nr 3,5 etter eit mønster eg har funna hjå Ronille

Adventsløpar og puter

2009-11-15T14:17:00.003+01:00

I fjor kjøpte eg stoff til dette adventssettet som det stod mønster på i Quiltemagasinet 4/08. No har eg fått gjort det ferdig og har det klart til at det kan tas i bruk til adventstida som vi har framføre oss. Det er AnnAKa som har laga mønsteret. Vart veldig fornøgd med det, nydelege lillafargar.

ToneM sine havskumsokkar - septembersokkane

2009-10-18T16:16:00.002+02:00

Då er sepembersokkane i sokkealongen også i boks. Denne månaden var det ToneM sine havskumsokkar som skulle strikkast. Strikka i Perfect på pinne nr 3,5. Mønsteret er her

Junisokkane

2009-10-18T16:03:00.002+02:00

Her er junisokkane som eg har strikka i sokkealongen. Dei har vore ferdige lenge, men ikkje blogga før. Sokkane er strikka i Claudia Handpainted Yarn på p nr 2,5. Mønsteret er Army inspired socks og du finn det her

"Byhanen"

2009-07-26T13:55:00.003+02:00

Har endeleg fått gjort ferdig desse 4 kuvertbrikkene sydd etter eit AnnAKa mønster i Quiltemagasinet 1-08. Vart veldig fornøgd med både design og fargar, dei passar godt inn på kjøkkenet mitt.

Julisokkar

2009-07-24T18:57:00.005+02:00

I sokkealongen på HB for juli har eg strikka desse tubesokkane for baby frå Drops. Har strikka str 6-9 mnd i Sisu på p nr 2,5.

Feriestrikking

2009-07-24T18:38:00.004+02:00

På tur i bil nordover frå Bergensområdet til Nordland og tilbake, vart det god tid til å strikka. Resultatet vart seks kjøkkenklutar og 5 par lommetøflar. Begge delar er fine å ha som smågåver.

Sommarferie til Lofoten

2009-07-24T12:11:00.012+02:00

I sommarferien i år reiste vi med bobil frå Nordhordland nordover til Lofoten. Vi var same ruta for 2 år sidan også, men vi måtte berre ein tur til i år. Mykje fint å sjå, både når det gjeld natur og anna. Mange spennande små butikkar og kunstgalleri. Synes desse fiskehjellene i Henningsvær er nesten som eit kunstverk i seg sjølv, mot dei høge fjella, og himmelen.

Vi var også på Værøy og vitja eine kvalpen vi fekk i fjor sommar. På veg heimatt tok vi ferje frå Værøy via Røst til Bodø. Der måtte eg sjølvsagt vitja Lappedilla. Og freistinga vart stor. Kjøpte kit til AnnAKa si oppskrift Margerittar og Mathildes sommerveske. Ikkje nok med det. Sette meg opp på abbonnement på AnnAKa sitt fantastiske Eventyrteppe. Er alt i gang med alle 3 prosjekta.

På Værøy var vi så heldige at vi fekk stå med bobilane på den nedlagte flystripa på Nordland.
I det gamle flytårnet hadde noverande eigar starta med sjokoladefabrikk og innreda eit fantastisk flott lite utsalg. Gjett om vi snopa!

Vi var også innom Saltstraumen og mens ein del av følgjet fiska, gjekk andre på Husflidlaget sitt utsal like ved. Her var det utruleg mykje fint. Kjøpte to strikkepinneetui og eit lite etui til synåler.

Maisokkar

2009-05-28T20:24:00.004+02:00

Vart akkurat ferdig med maisokkane "Hubby house socks" før månaden er over. Som ein del andre har eg vald å strikka sokkane på den vanlege måten, og ikkje "toe-up" slik mønsteret viser. Sokkane er strikka i Perfect på p nr 3 og vart ca str 40.

"Sommerdag"

2009-04-14T18:56:00.003+02:00

I dag er det første sommardagen, ifølgje primstaven. Primstaven er snudd i dag og datoen syner 14. april. Primstaven eg har tatt bilete av, er laga på skulen av eldstedottera mi då ho gjekk i 5. klasse. Her hjå oss har sola skine frå ein aldeles skyfri himmel i heile dag, vi har verkeleg kjent på kroppen at det går mot varmare tider. Kva høver vel då betre enn å visa fram løparen "SOMMARDAG" på ein dag som denne? Mønsteret er AnnAKa sitt og er sydd i originalstoffa. Sjølve kua er handapplikert, elles har eg brukt frihandsquilting inni rutene og i rammene rundt. Løparen er alt gjeven vekk til søstera mi som bur på garden der eg vaks opp.

Mønsteret viser at det skulle syast på teksten "Ha ein fin sommardag" over kyrne, men eg valde å ikkje gjera det, synes løparen vert meir ein heilårsløpar utan denne teksten.

Vår på hytta

2009-04-13T13:27:00.003+02:00

Mesteparten av påskeferien har vi vore på hytta. Veret har vore skiftande alt frå høljande nedbør til nydeleg vårver med sol. Vi har ei fantastisk utsikt frå hytta, ser utover fjorden og over på snødekte fjell i bakgrunnen. Dette er delar av Folgefonna og er eit fantastisk skue når sola skin frå skyfri himmel. I bakkane bløma kvitveis og kusymre. Kusymre er ein nydeleg blomst som vi har masse av kring hytta.

Aprilklut

2009-04-13T12:55:00.002+02:00

Aprilkluten i kjøkkenklutalongen på HB har eg strikka i eit bomullsgarn frå Gjesdal på pinne nr 4. Mønsteret finn du her og er nesten likt det eg strikka i mars, men i denne påsketida er det mønster av ein påskehare i midten. Har strikka kluten større enn oppskrifta, då eg synes dei er altfor små til mitt bruk ellers. Fargen er beige, og er difor også bidraget mitt i "Et år i farger".

Aprilsokkar

2009-04-12T17:08:00.003+02:00

I sokkealongen for april kunne vi velja fritt blant Garnstudio sin oppskrifter. Eg valde heilt vanlege vrangbordsokkar i Fabel. Eit greitt strikkearbeid på køyreturen fram til hytta i påskeferien. Eg hadde 3 nøster Fabel, og då eg hadde strikka det eine paret, såg eg at eg ville ha nok til eit par til, og då vart det slik. Oppskrifta finn du her

Nåleputer

2009-04-12T16:40:00.004+02:00

Har sett desse fine nåleputene på fleire bloggar i det siste. I går kveld henta eg fram bomullsrestegarnet mitt og hekla to nåleputer. Synes eg har vore flink og prøvd å bruka opp bomullsgarnet til kjøkkenklutar i løpet av vinteren, men dette straffa seg no. Utvalet av fargar var minimalt, for det meste berre kvitt og mørke fargar. Ein annan ting eg oppdaga var at eg har altfor lite knappelager, har sjølvsagt ein del knappar, men minimalt med pynteknappar. Det må det gjerast noko med! Eine nåleputa har ikkje fått knappen festa endå, får venta til eg kjem meg avgarde på knappekjøp over påskehelga. Resultatet vart eg likevel godt fornøgd med. Oppskrifta kan du finna hjå Ruth, men mange andre som har denne i bloggen sin også.

"Toras påskeløpar"

2009-03-29T13:42:00.002+02:00

Har sydd ferdig "Toras påskeløper" som er eit av dei siste mønstera frå AnnAKa. Manglar nokre knappar til pynt, men dei får eg kjøpa på veg til påskeferien på hytta. Løparen har eg lagt på bordet i stova, men den skal få vera med på hytta neste helg den også. Eg har applikert rundt figurane med handsaum og så har eg frihandsquilta i ramma rundt og det lyse partiet i midten.

Likar ikkje å frihandsquilta, men øving gjer meister, så eg synes heldigvis det går betre og betre for kvar ting eg må frihandsquilta.

Owl socks

2009-03-15T17:30:00.002+01:00

Etter fleire forsøk har eg no fått gjort ferdig marssokkane i sokkealongen på HB. Starta med altfor tjukt garn og pinnar, men gjekk tilslutt over til Silja garn og pinnar nr 3 for at storleiken skulle verta slik eg ville. Desse sokkane er strikka etter toe-up prinsippet. Det vil seia at eg har starta med tåa og strikka oppover. Mønsteret på sokkane er ugler, som også er tema på mange andre alongar på Hobbyboden denne månaden.

"Bente"

2009-03-08T16:01:00.006+01:00

I vinterferien har eg sydd. Har hatt ein del uferdige produkt og materialpakkar liggjande, nokre frå i haust og eit par har eg kjøpt inn på nyåret. Det første eg har gjort ferdig er løparen "Bente"som er eit av AnnAKa sine mønster. Er ikkje så glad i frihandsquilting, så difor var denne enkel å quilta med buer på tvers av løparen. Då eg skulle sy fast snora, la eg Solvy over snora før eg sydde ho fast. Solvy er ein slags plast som løyser seg opp i vatn. Det hadde eg aldri prøvd før, men det viste seg å vera nyttig til dette bruket .

Hjartesokkar

2009-03-02T15:17:00.004+01:00

Dette mønsteret har eg strikka tidlegare også for eit par år sidan i samband med valentinsdagen.

Mønstret heiter Valentine Heart Socks og du finn det her. Då eg sat og strikka på desse sokkane, kom eldstejenta mi heim og hadde fått russeklærne sine som ho skal bruka til russefeiringa i vår.

Vi fann difor ut at dei passar perfekt til russedrakta og døypte dei straks om til russesokkar. Kjært barn har mange namn: hjartesokkar, valentinsokkar, russesokkar ....

Sokkane er strikka i Perfect frå Sandnes Garn på pinne nr 3,5. Etter å ha strikka februarsokkane i sokkealongen på HB i Perfect, fall eg heilt for dette garnet, mjukt og godt og raskt å strikka med.

Marsklut

2009-03-02T14:57:00.004+01:00

Her kjem kluten som er strikka i kopptuealongen for mars. Mange alongar på Hobbyboden har

ugler som tema i mars, dei som står bak alongane har gått saman og funne eit felles tema. Kluten eg har strikka heiter difor Owl Dishcloth og mønsteret finn du her.Ugler går igjen også i sokkane som eg skal strikka i sokkealongen, og også i fleire av dei andre alongane.

Supert påfunn!

Nye bøker

2009-03-02T14:50:00.004+01:00

Har kjøpt meg to nye bøker: Strikk til Nøstebarn og Favorite Socks. Mange flotte sokkeoppskrifter i sokkeboka.

Vottar i riller

2009-02-14T15:17:00.002+01:00

Det er mange som har strikka denne etterkvart såkalla ToneM votten, og no har eg også fått strikka eit par. Vottane er strikka i 4 delar og hekla saman. Morsomme og enkle. Dei er strikka i Perfect frå Sandnesgarn på pinne 3,5. Desse likte eg så godt at desse skal eg ha til meg sjølv.

Oppskrifta er ei handskriven oppskrift som kjem frå Garnstua i Steinkjer.

Opalsokkar

2009-02-14T15:14:00.001+01:00

Har gjort ferdig desse to sokkepara som er strikka i Opal ca str 38.

Luer og halsar

2009-02-09T19:10:00.005+01:00

For nokre veker sidan strikka eg to halsar og to luer til jentene mine. Den første lua vart altfor stor, så den har eg no strikka på nytt att i helga. Luene er strikka i Alfa på pinne 6 og 10. Halsane er strikka med ein tråd Alfa Glitter og 1 tråd Kitten Mohair på pinne 8 og 10.

Februarsokkar

2009-02-07T16:05:00.003+01:00

Er ferdig med februarsokkane (Kerttu) i sokkealongen på HB. Dei er strikka i Perfect garn frå Sandnes på pinne nr 3,5. Mønsteret er opprinneleg finsk, men finst også på engelsk her. Mønsteret var lett og raskt å strikka, og sokkane er laga i str 38.

Kjøkkenklut

2009-02-07T16:00:00.003+01:00

Her har eg strikka ein kjøkkenklut i eit mønster eg har fått frå Quilteline. Strikka i eit nøste dobbel Mandarin Petit på pinne nr 4.

Award

2009-02-04T20:53:00.005+01:00

Eg har fått ein award frå bitt@mi . Tusen, tusen takk. Kjempekoseleg.

Her er teksten som fulgte med, og som skal gis videre av andre igjen: Denne bloggen investerer i og tror på NÆRHET - nærhet i rom,tid og forhold. Disse bloggerne er usedvanlige, sjarmerende og søte,og formålet er å finne og å være venner. De er ikke opptatt av utmerkelser og selvhevdelse. Vårt håp er at når båndene på disse utmerkelser er kuttet, vil enda flere vennskap ha forplantet seg. Vær vennlig å gi litt ekstra oppmerksomhet til disse! Gi denne utmerkelsen til seks bloggere,som igjen må velge seg seks nye. Inkluder denne teksten på utmerkelsen deres.
Jeg vil gi den videre til torunnk, bente, liv-irene

Tysneskråker

2009-02-03T19:30:00.002+01:00

Desse gryteklutane etter AnnAKa sitt mønster Malangskråker sydde eg i haust, men eg har ikkje blogga dei før no. No har eg funne dei fram att for å ta dei med meg på hytta vår på Tysnes, dit vi skal til helga. Vi har hytte på garden der besteforeldra mine budde. Dei som kjem frå Tysnes vert ofte kalla "Tysneskråker". Difor laga eg desse gruteklutane for å ha på hytta og eg kallar dei for tysneskråker i stadenfor malangskråker.

Nye bøker

2009-02-03T19:25:00.002+01:00

Desse to bøkene har eg kosa meg med i helga. Har alle Tildabøkene etter kvart, og det er berre så utruleg mykje flott i dei som eg har lyst å laga. Men så er det den tida då ....

Unni sine sjarmtroll skal eg nok få starta på ein gong i vår håper eg.

Babyluer til Sierra Leone

2009-02-03T19:17:00.003+01:00

I dag har eg sendt avgarde 5 babyluer (stikka ei til etter at eg tok biletet) som skal til Sierra Leone. Der jobbar DENNE norske legen og han har i bloggen sin bede om fleire luer. Han fortel om at borna som vert fødde i dette varme klimaet, kan dø av varmetap! Vi er mange inne på Hobbyboden som har strikka luer og sendt til kona til legen. Ho reiser nedover 10. februar og eg veit ho har mange luer med seg i bagasjen.

Dåpskjole til Babyborn

2009-02-01T18:54:00.002+01:00

Har strikka dåpskjole, lue og sokkar til Babyborn. Mønsteret er frå Målfrid Gausel si bok

"Vi strikker dukkeklær". Settet er strikka i Mandarin Petit på pinne 2,5.

Februarklut

2009-02-01T18:42:00.003+01:00

Har strikka februarkluten i kopptuealongen. Mønsteret heiter King Charles Brocade og kluten er strikka i Muskat på pinne nr 4.

Spiralsokkar

2009-01-25T15:47:00.002+01:00

Desse sokkane er strikka i Robust på pinne nr 3,5. Mønsteret har eg funne i Ronille sin blogg.

Kjem nok til å strikka fleire av desse.

Januarklut

2009-01-25T15:39:00.002+01:00

Har meld meg på årets kjøkkenklutalong, og her er januarkluten som er strikka i Muskat på pinne nr 4. Dette garnet har eg hatt liggjande i mange år saman med fleire nøster i andre fargar. No har eg tenkt å bruka dette restgarnet til klutane i alongen framover.
Mønsteret er frå Drops Design og omgjort frå eit gryteklutmønster. Har strikka rutestrikk med 4 rett og 4 vrang i 4 omg, deretter 4 vrang og 4 rett i 4 omg osv.

Londontur

2009-01-25T15:15:00.010+01:00

Har vore på ein fantastisk flott tur

til London.

Målet for turen var å delta på messa: Bettshow, ei utdannings- og teknologimesse. Her var det så mykje å sjå på at vi gjekk rundt der i to heile dagar, og likevel var det nok mykje vi ikkje fekk med oss.

Dei to siste dagane var vi turistar. Sjølv om eg ikkje er nokon stor fotballentusiast, var det ei stor oppleving å vera på fotballkamp på heimebana til Chelsea. Med nær full tribune -

42.000 - og ein av dei beste plassane, og 2-1 til

heimelaget, fekk vi full valuta for pengane.

Musicalen Sound of Music var berre heilt utruleg

flott. Vi var også med på ei spesiell gudsteneste i Westminster, og siste dagen tok ein sightseeingbuss rundt i London slik at vi fekk med oss dei mest kjende serverdigheitene.

Thermis

2009-01-13T23:15:00.005+01:00

Då har eg kasta meg på Thermisbølgja som herjar på Hobbyboden eg også. Har strikka med dobbel tråd på pinne nr 4 i tynn alpakka frå Rauma. I morgon drar eg til London på ei utdannings-/teknologimesse i samband med jobben, så då passar det godt å ha med ein god og mjuk hals å ha på seg på vandring rundt i byen.

Knappane skal bytast ut så snart eg får kjøpt nokon finare, desse får gjera nytte inntil vidare.

Januarsokkar

2009-01-11T20:24:00.003+01:00

Har meld meg på sokkealongen i år, og skal prøva å strikka eit par sokkar kvar månad.

Årets første sokkar er Pi-socks. Eg valde å strikka dei i Pt5 garn på pinnar nr 2,5. Morsomt å strikka desse sokkane, som er strikka i striper etter talrekkja i Pi (3,14159 26535 89793 23846).

Eg rekna ut at eg slapp å strikka ned til den første nullen, difor strikka eg etter desimalane slik dei står.

Engel i hardangersaum

2009-01-11T20:19:00.002+01:00

Denne nydelege engelen i hardangersaum har søstera mi laga til meg i julegåve. Eg synes den er veldig flott og gler meg til å ta den fram att til neste jul.

La Rose er ferdig

2008-07-29T23:44:00.002+02:00

Har fått gjort ferdig La Rose etter AnnAKa sitt mønster i Quiltemagasinet. Kjøpte inn maling og pensel og prøvde meg på paintstick for første gong. Det var enkelt å få det til, for som vanleg har AnnAKa gode og detaljerte arbeidsbeskrivelsar. Er ikkje så veldig glad i frihandsquilting, men heldigvis skulle det berre quiltast med "linjer" på denne løparen.

Summer Dreams sokkar

2008-07-29T23:37:00.002+02:00

Har strikka ferdig eit par sokkar i Bamboozle garn. Herleg garn å strikka med i varmen som vi har no om dagane. Sokkane er strikka i ca str 35/36, hadde tenkt at dette skulle verta eit par sokkar til meg sjølv, men garnet rakk ikkje til min størrelse, sjølv om mønsteret sa at det skulle vera nok med to nøster. Dermed vart det nye sokkar til yngstejenta i huset istadenfor.

"La Rose"

2008-07-17T19:00:00.004+02:00

Har starta å sy denne løparen som det stod mønster på i Quiltemagasinet nr 2/08. Gjett kven som har laga mønster? AnnAKa sjølvsagt. Har sydd mange ting som ho har designa - og fleire vert det om du følgjer med i bloggen min framover. I denne løparen skal det brukast paintstiks - oljestiftar. Det har eg aldri før brukt, men teknikken er enkel. Først vaska, tørka og strauk eg stoffet eg skulle bruka paintstiks på. Så teikna eg teksten over på frysepapir (dette måtte eg kjøpa på ein matvarebutikk/kjøttdisken), og klipte ut bokstavane med ei lita, tynn saks. Så strauk eg frysepapiret fast oppå stoffbiten. Deretter fjerna eg den ytre hinna på krittet med ein liten kniv og gnei krittet mot eit tørkepapir slik at lause partiklar vart fjerna. På eit papir laga eg ein flekk med maling og gnei ein pensel inn i malinga. Tilslutt mala eg over bokstavane i sjoblongen og reiv papiret forsiktig av. No skal malinga tørka i 3-5 dagar før eg kan skylla og tørka stoffet og sy vidare på arbeidet.

På pinnane

2008-07-17T18:44:00.003+02:00

Har starta på eit par sokkar i eit garn eg har hatt liggjande ei stund.

Hekla tunika

2008-07-17T18:36:00.002+02:00

Har hekla denne tunikaen til meg sjølv. Modellen sjølv syntes tunikaen var litt for stor til ho, men var likevel villig til å la meg få ta bilete. Masse luftmasker og det beste av alt; nesten ingen montering, berre nokre trådendar å festa. No er det berre å venta på fint sommarver att,
slik at eg får tatt tunikaen i bruk.

Kvalpekull nr 2

2008-07-17T18:25:00.002+02:00

3 døgn etter at den eine tispa vår fekk kvalpar, fekk den andre tispa vår eit kull på 4 kvalpar.
I dette kullet er det 1 tispe og 3 guttar, den eine av guttekvalpane er kremfarga. Denne fargen er ikkje godkjent etter norske reglar, men er godkjent i bl.a. Japan, der hunderasen opprinneleg kjem frå. Den vesle lyse kvalpen er heilt nydeleg, og det er mange som gjerne vil ha ein kremfarga Shiba, så det vert ikkje vanskeleg å finna ein god heim til denne kvalpen også.
No har vi totalt 7 kvalpar, så det skal verta liv og røre i huset framover. Den vesle kvalpen frå forrige kull er alt no ein rund og god liten krabat, så det gjekk heldigvis bra med han.

Kvalpekull

2008-07-14T19:02:00.005+02:00

Det har vore stille her på bloggen min ei god stund no. Har hatt ein travel forsommar utan den heilt store tida til handarbeid. Har fått ferdig nokre Ufoar, men dei får eg visa ein annan dag.

I går fekk den eine tispa vår 3 kvalpar, ei tispe og to guttar. Dette er andre kullet hennar.

Den eine guttekvalpen var litt liten og pjuskete, så vi har passa ekstra godt på at han finn fram til "matfatet". Hyppige veiingar viser at han tar til seg næring og legg på seg, så det ser ut til at dette skal gå bra.

Hunden heiter Akane (eit japansk namn som betyr fargen på soloppgangen/solnedgangen) og

rasen heiter Shiba.

Byveska

2008-05-25T18:18:00.003+02:00

Har sydd ferdig Byveska. Igjen har eg brukt eit mønster frå AnnAKa. Vart veldig godt fornøgd med resultatet. Har ein god del igjen av stoffa eg har brukt, så kanskje lagar eg ei veske til i gåve til ei som fyller år i sommar. Veska var lett og rask å sy, AnnAKa har alltid grundige og nøyaktige beskrivelser i mønstera sine. Inni er veska fòra med glidelåslomme, ei stor lomme, mobiltelefonlomme og 2 lommer til pennar.

Babyborn klær

2008-05-10T16:53:00.005+02:00

Har laga eit strikkesett til Babyborn. Settet er strikka i Dale babyull.

Butterfly

2008-04-27T18:38:00.002+02:00

Er endeleg ferdig med ein ufo som eg starta på for omtrent eit år sidan. Mønsteret er AnnAKa sitt "Butterfly". Har brukt Angelina i metalliske fargar inni sommarfulglane. Dette var ein ny teknikk for meg. Angelina er eit syntetisk og tørt materiale som ved hjelp av varme(strykejern) kan lagast til "stoff" som kan brukast til dekor i lappeteknikk og tekstilar.

Babysokkar

2008-04-27T18:29:00.002+02:00

Har strikka eit par babysokkar. Synes dei vart fine med den artige tåavslutninga.

Høgtidsenglar AnnAKa

2008-04-02T19:41:00.004+02:00

Har gjort ferdig juleløparen sydd etter AnnAKa sitt mønster Høgtidsenglar. Løparen var eigentleg lettare å sy enn eg hadde trudd på førehand. All applikasjon har eg handsydd, synes det er eit koseleg arbeid å setja seg ned med.

Fleire kjøkkenklutar

2008-04-02T19:37:00.004+02:00

I løpet av påskeferien forsvann alle kjøkkenklutane eg hadde strikka like før påske. Har eit par att på hytta, resten har eg gitt vekk i gåver. Derfor har eg strikka nye, for å ha på mitt eige kjøkken i heimen.

Trekantsjal

2008-03-15T18:20:00.002+01:00

Har strikka eit trekantsjal i to grønfargar i Drops Alpaca garn. Sjalet er strikka i 1 p rett og 1 p vrang. Starta med 3 masker og auka 1 m annankvar omgang til eg hadde ca 100 masker på pinnen, deretter felte eg 1 m annankvar omgang til eg hadde 3 masker att. Litt før spissen begynte eg å strikka stripene - to omganger med kvar farge.

Kjøkkenklutar

2008-03-15T18:11:00.005+01:00

Har vore heilt hekta på å strikka kjøkkenklutar ei stund, så då vart det produsert ein ny kjøkkneklut kvar dag. Har strikka dei i Tuva på denne måten: Legg opp 60 m, strikk 1 omg rett og 1 omg med 1 r, 1vr. Eg strikka til garnet tok slutt. Denne tjukkelsen på kjøkkenklutar er den eg likar best, likar dei ikkje når dei vert for tjukke.

Høgtidsenglar

2008-03-15T18:05:00.004+01:00

Har fått klipt ut alle delane til englane, så no har eg kome så langt at eg kan ta til å applikera. Eg er veldig glad i å applikera for hand, så dette skal eg ha med på hytta og kosa meg med der. Fargane er heilt annleis på biletet enn det dei eigentleg er.

Hjertelige lapper

2008-03-15T17:56:00.002+01:00

Har kjøpt meg ei ny bok om lappeteknikk av Lise Bergene. Masse fine mønster på ting som ikkje ser altfor vanskelege ut å laga, så kanskje eg kan få yngstejenta mi med på litt sying i løpet av påskehelga.

Høgtidsenglar

2008-03-02T18:42:00.003+01:00

Har kjøpt mønster og stoff til AnnAKa sine Høgtidsenglar. Dei to siste åra har eg prøvd å få tid til å sy denne løparen før jul, men eg har ikkje klart det. No har eg funne ut at eg får begynna i andre enden; altså begynna etter jul og ikkje like før, slik at det kan vera eit håp om at eg kan leggja denne nydeleg løparen på bordet til jula 08. Har klipt ut alle stripene og sydde desse saman. Neste steg vert å klippa underlag og vatt, og quilta desse laga saman med stoffstripene. Så skal eg klippa ut alle applikasjonsbitane og få desse sydd på.

Veska er ferdig

2008-03-02T18:32:00.005+01:00

Denne helga har eg fått gjort ferdig veska mi. Har gjort ferdig lukkekanten og sydd på hanker.

Manglar trykknapp slik at eg får lukka den igjen, men det hadde eg ikkje i hus, så det får venta til eg skal til byen i morgon.

Veska har to store lommer innvendig, ei mobiltelefonlomme og ei lomme med glideslås.

"Myk start"

2008-03-02T18:16:00.005+01:00

Denne veka har eg vore på strikkekafè i Knarvik. Strikkekafeen vart arrangert av Hillesvåg Ullvarefabrikk (Hifa) i samarbeid med forfattaren av boka "Myk start": May B. Langhelle.

Kjempefin bok med mange fine oppskrifter 0-1 år. May viste fram mange modellar strikka i herlege garnkvalitetar - angora, alpakka, kasjmir, mohair, silke, ull og bomull. Har starta med eit babyteppe som eg skal strikka av angoraulla mi. Trur det kjem til å verta luftig og lett - og veldig mjukt. Ull frå angorakaninar isolerer opptil 10 gongar meir enn saueulla.

Angorakaningarn

2008-02-24T15:56:00.003+01:00

Bente har vore så snill og spunne opp ein del av ulla eg har fått frå angorakaninane min. Eg har ikkje lært meg å spinna endå, sjølv om utstyret har vore på plass lenge. Men ein gong når eg får tid .... På torsdag skal eg på strikkekafè i Knarvik, og då skal eg kjøpa meg strikkeboka"Myk start" av May Bente Langhelle. Forfattaren skal sjølv vera tilstades og signera boka. Eg har bladd gjennom boka, og veit at det finst mange fine oppskrifter som eg kan bruka til angoragarnet mitt.

Lommetøflar

2008-02-24T15:37:00.004+01:00

Av restegarn frå fjellsettet eg strikka, har eg laga 2 par lommetøflar. Desse tøflane er veldig kjekke og strikka, så det er nesten slik at eg ikkje kan leggja arbeidet frå meg før eg er ferdig med eit par.

Veskeframdrift

2008-02-24T15:31:00.002+01:00

Har sydd på denne veska i helga. No har eg berre att lukkekanten og hankane. Har tenkt å gjera veska ferdig på kurset på tirsdag.

Veske med lokk

2008-02-21T18:36:00.003+01:00

Sist veke begynte eg på "klubbkurs" i http://www.quiltekroken.no/ Vi er 10 damer som syr saman annankvar tirsdag. Her får me gjort ferdig ufoar og får inspirasjon av kvarandre til å ta til på nye ting. Første kvelden starta eg på ei veske med lokk etter ei oppskrift av Bente Malm.

Har klipt ut alle delane til både sjølve veska og stoffet eg skal ha til for inni veska, og kome godt i gang med quiltinga.

Veggoppheng AnnAKa mønster

2008-02-21T18:21:00.005+01:00

Dei siste dagane har eg sydd vidare på ein Ufo eg begynte på for eit år sidan. No gjenstår berre

litt meir quilting og lukkekantar, men det får vera til eg får godt dagslys att.

Sokkar med mønster

2008-02-21T18:02:00.004+01:00

Har endeleg fått ferdig sokkane. Først var det ein del feil i mønsteret og så fekk eg for lite garn av den eine mønsterfargen, men no er heile settet klart til å takast i bruk.

Eg har funne mønsteret i boka "Varmekilder".

Lue, vottar og sokkar

2008-02-10T19:52:00.000+01:00

Har strikka ferdig vottar og lue til mannen i huset. Han treng varmt ulltøy når han dreg til fjells. Lua er strikka med hals til å brette ned ... og vil han ikkje brette den ned, kan han brette den opp! Det høyrer også med sokkar til det same settet, er nesten ferdig med den eine og kome halvvegs på sokk nr 2. Mykje arbeid, og litt kronglete fordi det var ein del feil i oppskrifta i tillegg til at eg måtte strikka sokkane i mindre storleik enn oppskrifta. Sjølv om eg brukar tynnare pinnar, vart sokkane for lange og eg må tilpassa oppskrifta før tåfellinga.